|
Ah’m scunnered sittin’
at this desk
An’ Maths is jist a
bore
Ootside the sun is
shinin’ doon
Ah long for Maibole
Shore.
Or the waterfa’ below
Kildoon
Sae cool an wide an
deep.
Och, come oan Wullie,
ring the bell
Afore ah fa’ asleep.
Tae wan’er up o’er
Mochrum Hill
Wid be better far than
school,
Ah’d even settle fur
the Park
An’ a quiet gemme o’
Bool.
Ah’m sure Aul Meg is
stirrin’
Feels the need tae
exercise her airm
Ach Wullie Rodger ring
that bell
Ah’m sure she intends
me herm.
This stupid question’s
rubbish
Ah’d like tae toss the
whole loat in the bin
Oh, help,Aul Meg she’s
speirin me
Aye Miss ah’m workin oan at yin
Oh Naw! Ah’m affy sorry Miss
I mean Yes Miss I’m working on at one.
Aul’ witch, ye should
be thankful
Ah’ve a pencil, no a
gun.
The wellies, Miss? Ah’m sorry
Ye see mah shoes is needin soled
They’ll no be richt fore Friday nicht
Or so ah have been told.
Aw Miss, it’s no mah faut, ye see
Ah’ve no goat anither pair.
The aul’ bitch winna
listen
She jist storms across
the flair.
Aw noo she’s flung the
cupboard wide
Here it comes.. the
aul’ Lochgelly
Coz ah’ve no goat mah
guid bits oan
She’s gonny gie me
welly.
Wan searin’smash fur
‘gutter talk’
Wan mair fur lack o’
shoes
She plays her ain tune
every day
Ah ca’ it ‘Baker’s
Blues’.
She’s jist a sad aul’
biddy
Whae equates
intelligence wi’ social staunin’
She cannie see the
licht in him
The Future that is
dawnin’
That when the Wheel o’
Time moves oan
When the Bell o’ Life
is rung
Frae oot yon honest
gypsy laddie
A fine Makar has
sprung.
An’ noo he’s
traivelled faur an wide
There’s oceans lie
atween
Still ah’ll gladly
grasp yon laddie’s haun
Ah’m prood tae ca’
him…Freen.
George McEwan
|
