|
Doon past Peat’s cottage whaur it keeks
Oot at the road frae hint the wid,
Alang the Wrack Road bye the brig
We rin wi’ faces rid.
Perchance we’ll stoap tae cock an e’e
Whaur some wee yella yittie’s nest
Is steekit mang some jaggie bush
Whae’s thornies offer aye a test.
Then oan we jig past cottages
That squat afore Balchriston’s mains,
Doon tae Goatsgreen an’ Maibole Shore,
A cheerfu’ bunch o’ gangrel weans.
Tae pass the first o’ simmer’s freedom days
Amang the dunes an’ wids tae roam.
Tae kick a ba’, tae big a fire,
Tae soom wi’in the dancin’ foam.
Oot yonder Ailsa’s muckle crag
Sits like a giant current bun,
While ablow Culzean’s daurk cliff the caves
Haud oot their offer o’ mair fun.
Wi’in yon daurk an’ weepin’ wa’s
The licht o’ day syne dies a daith.
A loon micht in its daurkness chance
Upo’ the lang loast piper’s wraith!
We’ll later head oot Northward bound
Bye Paddy’s Hut an’ Rancleugh Burn
Tae the Swimmin’ Club at Croy’s side
Perchance we’ll tak anither turn.
An’ sae the happy oors speed bye,
Till the sun slides doon ahint Goatfell.
It’s time tae mak the hameward trek
Oor grumlin’ stumicks tell.
Reluctantly we start oor merch
Back tae aul’ Maibole toon,
Oor weary legs remind us aye,
The Wrack Road seems much steeper, lads
Gaunin up than comin doon.
No’ fur oor gang the luxury
O’ Billy Arrol’s bus or caur,
Jist rin-a-pole an’ walk-a-pole,
Tae cadge a lift we dinna daur.
At last we win tae Gallowshill
The toon below’s a welcome sicht
The scents o’ suppers spur us hame
An’ sae tae yin an’aw…Guidnicht.
George McEwan
Glasgow 2005
|
